في حد فيكوا قبل كدا فكر في شعور الكتكوت جوا البيضة ؟
انا بقي فكرت , فكرت في شعور الزنقة , الزنقة المادية , و المعنوية , و الحاجز الفكري اللي بتكونة قشرة البيضة علي طموحك , و فكرك و حتي أحلامك , القشرة دي اللي مهما اختلف لونها كانت بيضا , أو حمرا , او حتي كانت صفرا, فهي هي نفس البيضة , سواء بيضة دهب , او بيضة فضة , فهو هو نفس الحاجز , الحاجز النفسي , الحاجز المادي , هو هو نفس السجن.
تخيلتوا بقي معاناة الكتكوت الكائن الضعيف دا , سواء كان لونه اصفر او كتاكيتوا بني حتي...
هما الاتنين علي الرغم من اختلاف ألوانهم , أشتركوا في نفس الحاجز اللي هو البيضة.
بس علي الرغم من كدا فــ الكتكوت طلع محظوظ اخر حاجة , اصله بيقعد في البيضة دي 21 يوم بس , دا كمان , لو محدش ريحه من التعب دا , و عمله أوملت , او حطه في كيكة , و خلص هو من عذاب الزنقة دا , لكن الدور و الباقي علي اللي عايشين في البيضة طول عمرهم..
يعني الأول قالوا ان الأرض كروية , و بعد كدا قالوا أنها بيضاوية , و أكدوا بكدا نظرية البيضة الكبيرة..
ما تستغربوش أيوة احنا عايشين في بيضة كبيرة , بيضة محجوز فيها طموحنا , و أمالنا , و أحلامنا , و غير كدا كمان , كل واحد فينا عايش جوا أكتر من بيضة , بيضة حابسة طموحه , و نجاحة , و بيضة حاجزة أحلامه , و هتلاقي حتي الظروف , و حتي البشر , بيحبسوا بعضيهم جوا البيضة , في منا اللي بيكسر بيضة في حياته , بس بيفضل برضوا جوا بيضة تانية..
و لما جيه علي بالي دلوقتي سؤال هو مين جيه الأول الكتكوت , و لا البيضة , تأكدلي أن الكتكوت خارج من الحسبة خالص , لأن بالمنظر دا , البداية و النهاية هي البيضة , و ما فيش كتكوت نجح من الخروج منها , إلا علي فوووق عدل...
كل واحد فيكم يفكر و يقلب الفكرة في دماغه , و يحسب كدا في كام بيضة في حياته
و اللي هيشاركني حقدي علي الكتكوت انه عايش 21 يوم بس جوا البيضة , يتفضل يعمل كومنت , أو يعمل ليك
(رسالة إلي كل بيضة في حياتي , الصبر من عندك يارب)
يا مصبر الكتكوت علي زنقة البيضة
0 التعليقات:
إرسال تعليق